ភ្នំពេញ៖ សម្ដេចតេជោបញ្ជាក់ជាថ្មីថាគ្មានការចាំបាច់ក្នុងការបិទប្រទេសឡើងវិញនោះទេ ដោយសារកម្ពុជាបានសម្រេចការចាក់វ៉ាក់សាំងជូនពលរដ្ឋពេញលេញហើយ តែអ្វីដែលសម្ដេចតេជោ សំណូមពរគឺសូមដល់ពលរដ្ឋទៅទទួលវ៉ាក់សាំងតាមការណែនាំរបស់ក្រសួងសុខាភិបាល។

ថ្លែងក្នុងពិធីសំណេះសំណាលជាមួយមួយប្រតិភូកីឡាអាស៊ានប៉ារ៉ាហ្គេមនៅព្រឹកថ្ងៃពុធ ទី០៦ ខែកក្កដានេះ សម្ដេចតេជោ ហ៊ុន សែន ថាការចាក់វ៉ាក់សាំងគឺបានការពារសុខភាពរបស់ពលរដ្ឋពីការឆ្លងជំងឺកូវីដ-១៩ ដូច្នេះការទៅទទួលវ៉ាក់សាំងគឺមានសារៈសំខាន់ក្នុងការការពារអាយុជីវិតពលរដ្ឋពីជំងឺឆ្លងរាលដាលខណៈដែលកម្ពុជារកឃើញការឆ្លងរាលដាលនៃជំងឺកូវីដ-១៩ សារជាថ្មីនោះ។

បន្ទាប់ពីស្ងប់ស្ងាត់អស់រយៈពេល ៥២ថ្ងៃមក នៅថ្ងៃទី២៨ ខែមិថុនា ជំងឺកូវីដ-១៩ បានផ្ទុះឡើងសាជាថ្មីដែលបង្កជាការព្រួយបារម្ភពីការឆ្លងរាលក្នុងសហគមន៍កម្ពុជា។ សម្ដេចតេជោបានប្រកាសទាំងយប់ពីការរកឃើញឡើងវិញ បានស្នើដល់ពលរដ្ឋថែរក្សាសុខភាព និងជំរុញដល់ពលរដ្ឋទៅចាក់វ៉ាក់សាំងកូវីដ-១៩ តាមការកំណត់រៀងខ្លួន៕ 

^{PHOTO: KOK KY}